Industria Teknologia IIko ikasleen proiektua.

Industria Teknologia IIko ikasleek batxilergoko geletako mahai guztiak orekatu zituzten joan den asteazkenean, azterketak hasi orduko. Horretarako TableOne izeneko mahaien hanketan kokatzeko piezak ekoitzi dituzte 3D inprimatzailearekin kolokan zeuden mahai guztietarako. Gelaz gela pasatuz, aurkezpen bideo bat proiektatu eta beharra zuten mahaiak orekatu zituzten.

Produktuaren diseinua iazko ikasturtean ikasgai bereko ikasle talde batek Precious Plastic Durangaldea lehiaketarako aurkeztu zuen eta lehiaketako garaile atera ziren. Aurtengo apustua, berriz, iazko lana oinordekotzan jaso, beharrizanen araberako fabrikazioa burutu eta erabiltzaileengana helaraztea izan da.