Azaroaren 28an "Elkartasun Ikastolak europar kooperatiba-elkartea"ren Bazkideen Ohiko Batzar Orokorra egin zen Senpereko Kattalin Elizalde kolegioan. Ibaizabal Ikastolak ere, bazkide modura, parte hartu zuen Batzarrean. Elkartasun Ikastolak elkarteari esker, Euskal Herriko Ikastola guztietako familiek eta ikasleek egindako diru-ekarpenak behar gehien duten ikastolen artean banatzen dira urtero, beren biziraupena bermatzeko eta abian dituzten hezkuntza-proiektu estrategikoak bideragarri egiten laguntzeko. Euskal Herrian den elkartasun-egitura handienetakoa da hau, benetako babes-sarea, Ikastolen proiektua are eta sendoago egiten duena.

2024an Villabonako Zubimusu Ikastola, Tuterako Argia Ikastola, Elizondoko Baztan Ikastola, Iruñeko Jaso Ikastola, Berako Labiaga Ikastola, Lodosako Ibaialde Ikastola, Ipar Euskal Herriko Seaska Ikastolak (Kanboko eta Senpereko kolegioak) eta Ibaizabalen bazkide dugun Elorrioko Txintxirri Ikastola izan dira finantziazioa jaso dutenak. Hain zuzen ere, milioi bat euro jaso dute guztiek orotara. Elkarrekin erraldoiak gara!