Txekiako talde txapeldunak eta munduko gainontzeko taldeek Europako Masterren kopa jokatzen dute urtero Billiard Hockey deituriko mahai-jokoan. Aurten Euskal Herrian jokatuko da txapelketa irailaren 21ean, larunbata; hain zuzen ere, Ibaizabal Ikastola izango da egitarau osoa hartuko duen egoitza. Billiard Hockeya hockeyaren eta billarraren uztarketan datzan mahai-jokoa da. Durangon egingo den txapelketaren antolatzailea Basque Billiard Hockey Team da, eta Euskal Herriko delegazioa World Table Hockey Association-en parte da. Txapelketak Ibaizabal Ikastolaren babesa eta laguntza izango ditu. Egitarauari dagokionez, goizean, Txekiako hiru talde, bi euskal talde eta indiar talde baten arteko lehia izango dugu. Arratsaldean berriz, banakako txapelketa izango dugu eta edonork parte hartu ahal izango du.