Batxilergo lehenengo mailako zenbait ikaslek trukaldian parte hartu dugu Iruñeko San Fermin ikastolako ikasleekin. Otsailaren 26tik 29ra Iruñean izan ginen, bertako ikasleei bisita egiten eta Nafarroako historia eta kultura ezagutzen. Aste hori abentura eta ikaskuntza betea izan zen, eta hainbat ekintza interesgarritan parte hartu genuen.

Iruñean egon ginen bitartean, Amaiur bisitatzeko aukera izan genuen, bertan Nafarroako Erresumaren azken defendatzaileen historia ezagutuz. Gainera, Iruñeko hiria esploratu genuen, bere kale eta monumentu enblematikoekin. Nafarroako Museora ere joan ginen, arte eta historiari buruz gehiago ikasteko. Bukatzeko, Irulegin izan ginen, bertako aztarnategia bisitatuz eta azken aurkikuntzak ezagutuz.

Joan den astean, aldiz, Iruñeko ikasleak izan genituen gurekin Durangon. Haientzat ere aste zirraragarria izan zen, eta Euskal Herriko beste txoko batzuk ezagutzeko aukera izan zuten. Lehenik eta behin, Bilboko Guggenheim museoa bisitatu genuen, arte garaikidean sakontzeko. Ondoren, Bilboko alde zaharrean ibili ginen, bertako giroaz eta arkitekturaz gozatuz.

Abentura ere ez zen falta izan! Mendexako abentura parkean jolas eta erronkak gainditu genituen, elkarrekin barre egin eta laguntasuna sendotuz. Lekeitio ere bisitatu genuen, itsas ondarea eta herriaren xarma ezagutuz. Azkenik, Durangon ginkana bat antolatu genuen, gure herria modu dibertigarri eta interaktiboan erakusteko.

Esperientzia hau ahaztezina izan da, eta harreman berriak egiteko aukera paregabea eskaini digu. Iruñako eta Durangoko ikasleen arteko lotura sendotu da, eta ziur gaude etorkizunean ere elkar ikusten jarraituko dugula. Trukaldi honek gure kultura eta historia hobeto ulertzeko aukera emateaz gain euskara sustatzeko aukera ere izan da. Eskerrik asko parte hartu duzuen guztiei!