EHIko Bazkideen Ohiko Batzar Orokorra.
2020a eta 2021a "ezohikoak" izan dira Ikastolen Elkarteko ordezkariek joan den ostegunean Donostiako Kursaalean egindako Bazkideen Ohiko Batzar Orokorrean esandakoaren arabera. COVID-19ak ikastola bakoitza bere kudeaketa-plana doitzera eraman duen bezalaxe, halaxe egin behar izan du Ikastola guztiak batzen gaituen Ikastolen Elkarteak ere bere kudeaketa-planarekin. Ongi posizionatuta gaude, ordea, nola Ikastolen Elkartea, hala Ikastola bakoitza ere.
BIHAR egitasmoa eta Ikastolen VII Batzarra gogoeta-proiektu estrategikoak izango dira Ikastolentzat aurrera begira. Honako beste 4 arlo hauetan ere azpimarra jartzekoa da Ikastolen Elkartea, estrategikotzat dituelako: komunikazioa, hizkuntzen trataera, hobekuntza pedagogikoa eta hezkuntza-berrikuntza, eta digitalizazioa.
Euskal Herriko Ikastolen Batzar Orokorrean Maria Aldazabal presidenteak, Araiz Undabeitia Artezkaritza-kideak eta Iker Gómez de Segura zuzendariak hartu zuten parte Ibaizabal Ikastola ordezkatuz. Ikastoletan lehentasunezkoak diren beste hainbat gai aletu ziren Batzarrean: egoera zaurgarrian dauden ikasleen eta familien tratamendua Ikastoletan, berdintasuna, kontsumo jasangarria, ebaluazio-eredua, garapen curricularra, aniztasunaren trataera eta etorri berrien harrera eta inklusioa, materialgintza, Ikastoletako profesionalentzako formazioa, hezkuntza-lege berriaren beharra, finantziazio publikoa bideragarritasun ekonomikoa bermatzeko...
Aurkeztutako bide-orriak gehiengo zabalaren aldekotasuna eta babesa jaso zituen; oinarri paregabea garai berrietako hezkuntza-beharrei eragingarritasunez heltzeko.
