Zazpi ikastolei babesa gainerako ikastolek
Ikastola guztien arteko elkartasunak eta lankidetzak aukera ematen dute ahulen dauden Ikastolak laguntzeko, prozesu pedagogiko estrategikoak ziurtatzeko eta euskarak egoera latza bizi duen tokietan euskarazko hezkuntza bermatzeko, besteak beste. Abenduaren 1ean egindako Batzar Orokorrean erabaki dugu aurten zer Ikastola babestu, egoera zailean daudelako. Aratz, Argia, Bastida, Seaska, Harrobia, Argantzun eta Ibaialde Ikastolek guztira 833.000 € pasatxo jasoko dituzte beren biziraupena eta garapena ahalbidetzeko. Diru-zenbateko hau Ikastoletako familiek jartzen dituzten kuotetatik irten da.
Batzar Orokorrera 87 Ikastola bertaratu ginen, Ibaizabal Ikastola bera barne, eta botoen % 77 pasa ordezkatu genuen. Euskal Herri osoan zehar zabaltzen den elkartasun-keinu handienetakoa da hau.
